Gerd Gjinarari, i njohur si “Gerd Gjenerali” dhe një prej emrave më të njohur të botës së krimit në Shqipëri, është arrestuar nga autoritetet belge pas një kërkimi ndërkombëtar. Ai ishte i dënuar me burgim të përjetshëm nga drejtësia italiane për vrasjen e Naim Zyberit në vitin 1997 në Milano, një ngjarje e ndodhur në ambientet e një spitali ku Zyberi po kurohej. Gjinarari u ekstradua në Shqipëri në vitin 2014 për të vuajtur dënimin, por u lirua me kusht në vitin 2019 nga Gjykata e Korçës, vendim që shkaktoi reagime të forta në publik dhe u rrëzua më pas nga Gjykata e Apelit. Pas këtij vendimi, ai u largua dhe u shpall në kërkim ndërkombëtar, derisa u kap në Belgjikë dhe pritet të nisë procedura e ekstradimit.