Në një operacion të koduar “No Guns 2”, Policia e Fierit në bashkëpunim me Forcën e Posaçme “Shqiponja” arrestoi 43-vjeçarin Vasil Osmani, banues në fshatin Levan, për mbajtje pa leje të armëve të zjarrit. Gjatë kontrollit në banesën e tij u sekuestruan dy armë kallashnikov dhe municion luftarak, të cilat do t’i nënshtrohen ekspertizës në Institutin e Policisë Shkencore për të verifikuar nëse janë përdorur në ngjarje kriminale të tjera. Materialet procedurale janë referuar Prokurorisë së Fierit për veprën penale të mbajtjes pa leje dhe prodhimit të armëve dhe municionit luftarak. Ky aksion vjen si pjesë e kontrolleve intensive për goditjen e armëmbajtjes ilegale në zonë.