Një person me inicialet D.Z. është arrestuar në orët e vona të së enjtes në Mitrovicën e Jugut nga Policia e Kosovës, me urdhër të Prokurorisë Speciale, nën dyshimin për përdhosjen e flamurit të Turqisë dhe nxitje të përçarjes dhe mosdurimit. Sipas Prokurorisë Speciale, ngjarja ka ndodhur disa ditë më parë në një hapësirë publike në Mitrovicë, ku i dyshuari ka kryer veprën penale. Ai është ndaluar për 48 orë me vendim të prokurorit, ndërsa hetimet vazhdojnë në koordinim ndërmjet Prokurorisë Speciale dhe Policisë së Kosovës. Autoritetet theksojnë se procesi hetimor është në zhvillim e sipër për të sqaruar rrethanat e plota të ngjarjes.