Një 34-vjeçar nga Kosova, i dënuar me 1 vit e 6 muaj burgim nga autoritetet holandeze për veprat penale “Pastrimi i parave” dhe “Posedimi i lëndëve narkotike të forta”, është arrestuar në pikën kufitare të Morinës gjatë tentativës për të hyrë në Shqipëri. Policia Kufitare e Morinës, në bashkëpunim me DVP Kukës, e ndaloi atë në hyrje të territorit shqiptar, duke zbatuar kontrolle të rrepta për të goditur paligjshmëritë në kufi dhe për të ndaluar shtetasit e shpallur në kërkim ndërkombëtar. Informacioni u verifikua dhe u shkëmbye me Interpol Tiranën, duke konfirmuar se 34-vjeçari ishte në kërkim nga autoritetet holandeze, të cilët tashmë kanë nisur procedurat për ekstradimin e tij. Arrestimi tregon bashkëpunimin ndërkombëtar mes policive dhe përpjekjet për të luftuar krimin ndërkufitar dhe shmangien e përgjegjësisë penale.