Policia kufitare në Morinë, në bashkëpunim me DVP Kukës, ka arrestuar në hyrje të Shqipërisë shtetasin maqedonas K.E., 35 vjeç nga Shkupi, i cili ishte shpallur në kërkim ndërkombëtar për prodhim dhe shitje të lëndëve narkotike. Arrestimi u realizua gjatë kontrolleve dhe verifikimeve në kufi, me qëllim goditjen e paligjshmërive dhe ndalimin e personave të shpallur në kërkim që tentojnë të kalojnë ilegalisht. Informacioni i shkëmbyer me Interpol Tiranën konfirmoi se ndaj tij ishte caktuar masa e sigurisë “Arrest në burg” nga Prokuroria Publike e Shkupit për veprën penale të prodhimit dhe shitjes së narkotikëve dhe lëndëve psikotrope. Aktualisht, Interpol Tirana dhe autoritetet maqedonase po vijojnë procedurat për ekstradimin e 35-vjeçarit.