Një 31-vjeçar me shtetësi turke, i shpallur në kërkim ndërkombëtar nga autoritetet austriake për prodhim dhe shitje të lëndëve narkotike, është arrestuar më 24 shkurt në pikën kufitare Morinë, në hyrje të Shqipërisë. Arrestimi u realizua nga shërbimet e Policisë Kufitare Morinë në bashkëpunim me Drejtorinë Vendore të Policisë Kukës, gjatë kontrolleve të përzgjedhura dhe verifikimeve në hyrje-dalje të territorit shqiptar, me qëllim goditjen e paligjshmërive në kufi dhe kapjen e personave të shpallur në kërkim. Shtetasi turk me inicialet V. B., banues në Stamboll, është shpallur në kërkim nga Gjykata e Vjenës, e cila ka caktuar ndaj tij masën e sigurisë “arrest në burg” për veprën penale të prodhimit dhe shitjes së narkotikëve. Aktualisht, Interpol Tirana në bashkëpunim me homologët në Austri po vijon procedurat për ekstradimin e tij drejt Austrisë.