Policia e Kosovës në Prizren ka arrestuar një person me inicialet M.G., i cili ka pranuar të ketë kryer së paku pesë raste vjedhjesh, kryesisht në markete dhe vetura. Gjatë ndalimit të tij, në trupin e të dyshuarit është gjetur një substancë e dyshuar narkotike e llojit kokainë. Në koordinim me prokurorin kujdestar, është kryer bastisje në banesën e tij ku janë sekuestruar dëshmi materiale që lidhen me rastet e vjedhjes. Ndaj M.G. është caktuar masa e ndalimit për 48 orë, ndërsa hetimet vazhdojnë për të identifikuar persona të tjerë të përfshirë në këto vepra penale.