Një operacion i përbashkët ndërkombëtar mes autoriteteve shqiptare dhe spanjolle ka çuar në arrestimin në Vlorë të 30-vjeçarit Klevi Kananaj, i shpallur në kërkim ndërkombëtar për trafikim droge. Ai akuzohet për bashkëpunim në trafikimin e 82.84 kilogramëve kokainë, të sekuestruar në portin e Vigos në Spanjë më 5 shkurt 2026, ku gjatë ngjarjes u arrestuan edhe dy persona të tjerë në flagrancë. Roli i tij dyshohet të ketë qenë vëzhgimi i kontejnerit me lëndën narkotike nga jashtë terminalit, ndërsa pas ngjarjes u largua fillimisht drejt Katalonjës dhe më pas në Itali. Operacioni i koduar “Operacionalja 93” u realizua falë shkëmbimit në kohë reale të informacionit mes Interpol Tiranës dhe homologëve spanjollë, ndërsa vijon procedura për ekstradimin e tij drejt Spanjës.