Pas më shumë se një muaj në arrati, Policia e Kosovës ka arrestuar Ardian Kamberajn, i dyshuari për kanosjen e një zyrtari policor në Prizren. Incidenti ndodhi rreth një muaj më parë, kur Kamberaj i ishte afruar policit jashtë detyrës dhe e kërcënoi me fjalët: “S’ma nin mu që je polic. T’i bluaj eshtrat në makinën e mishit”. Pavarësisht ftesave të përsëritura për t’u paraqitur, ai kishte shmangur organet e rendit dhe nuk ishte vënë në dispozicion të hetimeve. Pas veprimeve intensive operativo-hetimore, hetuesit arritën ta lokalizojnë dhe arrestojnë të dyshuarin, i cili konsiderohet recidivist dhe ndaj tij është caktuar masa e ndalimit për 48 orë; hetimet vazhdojnë.