Një punonjës i shoqërisë private të sigurisë, Gerald Biba, 32 vjeç nga Durrësi, është arrestuar në flagrancë pasi u kap duke goditur me grusht një qytetar gjatë një tubimi në Zvërnec. Sipas hetimeve paraprake, ai së bashku me dy persona të tjerë e kanë tërhequr me forcë viktimën drejt një zone të rezervuar për rojet, duke i shkaktuar dëmtime të lehta trupore. Policia e Shtetit po heton rastin për veprat penale “Heqja e paligjshme e lirisë” dhe “Plagosja e lehtë me dashje”. Paralelisht, Drejtori i Përgjithshëm i Policisë ka urdhëruar nisjen e një hetimi disiplinor ndaj zinxhirit komandues të Drejtorisë Vendore të Policisë Vlorë për mënyrën e menaxhimit të tubimit dhe masat e marra.