Një shqiptar 44-vjeçar u arrestua në Itali gjatë një kontrolli rutinë në San Trovaso, pasi policia gjeti në makinën e tij 7 kilogramë kokainë të pastër të ndarë në blloqe gjysmë kilogrami. Droga ishte fshehur në një çantë shpine të vendosur midis sediljeve të makinës dhe ishte gati për t’u shpërndarë në zonën e Trevisos dhe rrethina gjatë festave të fundjavës. Arrestimi u bë pas dyshimeve të policisë për shkak të nervozizmit të dyshimtë të shqiptarit dhe përgjigjeve kontradiktore gjatë kontrollit. Përveç drogës, u sekuestrua edhe telefoni celular i tij, i cili do të ndihmojë në identifikimin e rrjetit të furnizuesve dhe klientëve, ndërsa ky operacion përfaqëson një rekord për policinë e Trevisos, duke tejkaluar edhe një operacion të madh të trafikut të drogës të verës së kaluar.