Policia e Kosovës ka zhvilluar një aksion në rajonin e Prishtinës, ku pas ndalimit të një automjeti me targa të Serbisë u gjet municion i kalibrit 9 mm i fshehur në një bunker të improvizuar. Në kuadër të operacionit janë kontrolluar katër lokacione të ndryshme dhe janë konfiskuar gjashtë armë zjarri, mbi 8 mijë fishekë, një shurdhues për armë, para të gatshme dhe një automjet i dyshuar për përdorim në veprimtari kriminale. Gjashtë persona janë shoqëruar për intervistim, ndërsa me vendim të prokurorit tre prej tyre janë dërguar në mbajtje për 48 orë. Hetimet vazhdojnë në bashkëpunim me organet e drejtësisë, ndërsa policia thekson se veprimet janë rezultat i informacioneve të brendshme dhe bashkëpunimit me Doganën e Kosovës.