Një shtetas turk, Halil Uçar, 39 vjeç, u plagos me armë zjarri mbrëmjen e së hënës në një restorant turk në zonën e Saukut të Vjetër në Tiranë. Ai mori një plumb në shpatull dhe ndodhet jashtë rrezikut për jetën, duke u trajtuar në Spitalin e Traumës. Ngjarja dyshohet të ketë motive personale, pasi mes Uçarit dhe autorit, gjithashtu shtetas turk, kishte pasur një konflikt të mëparshëm që kishte nisur në Turqi dhe ishte lënë për t’u sqaruar në lokal. Policia ka identifikuar autorin, i cili është larguar menjëherë nga vendi i ngjarjes, dhe po punon për kapjen e tij dhe zbardhjen e plotë të rrethanave të ngjarjes, ndërsa i plagosuri nuk ka qenë bashkëpunues me hetuesit deri tani.