Administrata Tatimore e Kosovës (ATK), në bashkëpunim me Prokurorinë Themelore në Mitrovicë dhe Policinë e Kosovës, ka kryer një operacion inspektimi në rajonin e Mitrovicës ku janë kontrolluar 29 biznese. Nga këto, në 27 biznese janë gjetur parregullsi të ndryshme, duke përfshirë moslëshimin e kuponëve fiskalë, mungesën e arkës fiskale, si dhe biznese dhe punëtorë të paregjistruar. Gjithashtu, janë evidentuar shkelje në mbajtjen e librave dhe regjistrimeve tatimore. ATK ka njoftuar se do të vazhdojë aktivitetet në terren për të siguruar zbatimin e ligjit dhe trajtim të barabartë për të gjitha bizneset.