Një ngjarje e rëndë ka ndodhur në fshatin Zllakuqan të Klinës, ku dy të rinj, Rinor dhe Erblin Avdyli, u lënduan pasi motori i tyre u godit qëllimisht nga një veturë Audi e kuqe. Fillimisht rasti u raportua si aksident trafiku, por pas analizimit të pamjeve nga kamerat e sigurisë, hetuesit dyshuan për një veprim të qëllimshëm dhe e klasifikuan si tentim vrasje. I dyshuari për këtë ngjarje është Florent Berisha, i cili u ndalua për 48 orë me urdhër të prokurorit, ndërsa automjeti u gjet i braktisur në fshatin Trestenik të Pejës dhe është sekuestruar për ekzaminime forenzike. Hetimet vazhdojnë për të zbardhur motivet dhe rrethanat e incidentit, ndërsa të lënduarit po marrin trajtim në Spitalin Rajonal të Pejës.