Një autobus që transportonte nxënës gjatë një ekskursioni u përfshi në një aksident mesditën e 18 qershorit në hyrje të qytetit të Elbasanit. Ngjarja ndodhi rreth orës 13:20, kur autobusi, pas një manovre të gabuar, u përplas me një automjet tjetër dhe përfundoi pas shtyllës së një karburanti. Pavarësisht përplasjes së fortë dhe panikut të shkaktuar tek fëmijët, fatmirësisht nuk raportohet asnjë i lënduar ndër nxënësit, ndërsa shoferi i makinës u dërgua në spital për ndihmë mjekësore. Në vendngjarje mbërritën forcat e policisë dhe emergjencës, të cilat po hetojnë rrethanat e aksidentit dhe po sigurojnë ndihmën e nevojshme.