Një autobus me 52 turistë, përfshirë fëmijë, u përfshi nga flakët mesditën e sotme në Qafën e Kalasë në Berat, teksa po ngjitej drejt Kalasë. Shkëndijat filluan në pjesën e përparme pranë motorit, dhe drejtuesi ndaloi menjëherë, duke lejuar pasagjerët të zbresin pa u lënduar. Zjarri përfshiu të gjithë autobusin, i cili u shkrumbua plotësisht, ndërsa flakët përhapën edhe në një automjet tip Benz fuoristradë të parkuar pranë, i cili u dëmtua rëndë. Forcat zjarrfikëse dhe policia ndërhynë në vendngjarje, ndërsa drejtuesi i autobusit u shoqërua për pyetje, me dyshimin se shkëndija elektrike në motor shkaktoi zjarrin.