Një autobus i një agjencie turistike ka dalë nga rruga dhe ka përfunduar në një kanal në zonën e Ishull-Shëngjinit gjatë mesditës së së shtunës, ndërsa po kthehej nga Shëngjini. Drejtuesi i autobusit kishte zgjedhur një rrugë dytësore për të shmangur trafikun e rënduar në dalje të zonës turistike, por gjatë kalimit në një segment të ngushtë rrugor, përballë tij u shfaq një automjet tjetër. Për të shmangur përplasjen, shoferi devijoi drejt skajit të rrugës, duke bërë që autobusi të rrëshqiste dhe të përfundonte në kanalin anësor. Në autobus nuk kishte pasagjerë, por vetëm anëtarë të stafit të agjencisë, të cilët dolën menjëherë jashtë pa pësuar lëndime, ndërsa u regjistruan vetëm dëme materiale. Policia rrugore po heton për të sqaruar shkaqet e aksidentit.