Agjencia e Ushqimit dhe Veterinarisë (AUV) ka parandaluar importin e rreth 50 tonëve ushqim të pasigurt në vend gjatë javës së kaluar, pas kontrolleve të intensifikuara në pikat kufitare. Në pikën kufitare Qafë Thanë, u ndalua importi i 27 tonëve mish të grirë nga Paraguai, pasi mishi vinte nga një strukturë e pamiratuar dhe nuk plotësonte standardet e sigurisë. Gjithashtu, u bllokuan 22 tonë arra nga Kazakistani për shkak të etiketimit joadekuat dhe devijimeve nga kriteret e cilësisë dhe sigurisë. Ngarkesat janë kthyer në vendet e origjinës dhe nuk lejohet që të hyjnë në tregun maqedonas, ndërsa AUV apelon për respektimin rigoroz të rregulloreve ligjore për mbrojtjen e shëndetit të qytetarëve dhe njofton se kontrollet do të vazhdojnë me intensitet të lartë.