Një avion privat Cessna Citation Latitude, në pronësi të biznesmenit turk Hamdi Akin, doli nga pista dhe u përfshi nga flakët gjatë një uljeje emergjente në Aeroportin Ndërkombëtar të Misratës në Libi. Avioni, i cili po fluturonte nga Stambolli drejt Misratës për të marrë pasagjerë, ishte pa pasagjerë në bord në momentin e incidentit. Ekipet e emergjencës arritën të nxirrnin të gjallë dy pilotët dhe një pjesëtar të ekuipazhit, të cilët janë në gjendje të mirë shëndetësore. Pas ngjarjes, Ministria e Transportit të Libisë pezulloi fluturimet në aeroport dhe nisi hetimet për shkaqet e daljes nga pista dhe shpërthimit të zjarrit.