Një organizatë kriminale shqiptare që operonte në rajonin e Antwerpit të Belgjikës është goditur pas një hetimi disamujor, duke rezultuar në dënime me burg deri në 6 vjet për trafikimin e rreth 7 ton kokainë dhe 191 kilogramë kanabis. Hetimi nisi në shkurt 2024, kur policia ndaloi një makinë me targa rumune dhe zbuloi drogë të fshehur në një furrë mikrovalë të modifikuar, çka çoi në zbardhjen e rrjetit dhe monitorimin e disa lokacioneve ku u gjetën dy laboratorë për përpunimin e drogës. Gjatë bastisjeve u sekuestruan mbi 1,400 litra kimikate, makina numërimi parash, telefona dhe mbi 3.1 milionë euro nga aktiviteti kriminal. Dënimet më të rënda iu dhanë drejtuesve të organizatës, ndërsa gjykata urdhëroi konfiskimin e aseteve kriminale dhe gjoba të konsiderueshme për anëtarët e grupit.