Banorët e fshatit Lutogllavë së bashku me ata të disa fshatrave përreth kanë paralajmëruar një protestë paqësore për shkak të zjarrit që ka përfshirë deponinë lokale. Ata shprehin shqetësim të thellë për rrezikun që kjo situatë paraqet për shëndetin dhe jetën e tyre, duke kërkuar ndërhyrje urgjente nga institucionet përgjegjëse. Protesta do të mbahet më 18 korrik në orën 08:00 pranë hyrjes së deponisë dhe është organizuar në koordinim mes banorëve të Lutogllavës, Trestenikut, Ruhotit, Cërfkës, Leshanit, Ramunit, Llabjanit dhe Nabërgjanit. Ata theksojnë se ndotja nga zjarri po ndikon jo vetëm në Lutogllavë, por edhe në fshatrat përreth, duke krijuar një rrezik serioz për mjedisin dhe shëndetin publik.