Zyra e Kryeprokurorit të Shtetit dhe Zyra Kombëtare e Auditimit organizuan në Ferizaj një punëtori rajonale me qëllim forcimin e bashkëpunimit ndërinstitucional në identifikimin dhe referimin e dyshimeve për vepra penale gjatë auditimit. Në këtë aktivitet morën pjesë prokurorë nga rajonet e Ferizajt dhe Gjilanit, përfaqësues të ZKA-së dhe Programit të Kombeve të Bashkuara për Zhvillim. Prokurori Bahri Hyseni vlerësoi se këto punëtori janë rezultat i bashkëpunimit të mirë ndërmjet institucioneve dhe do të vazhdojnë të organizohen në rajone të tjera për të rritur koordinimin dhe efektivitetin në trajtimin e rasteve. Ai theksoi se bashkëpunimi i vazhdueshëm do të mundësojë identifikimin dhe trajtimin më efikas të veprave penale të evidentuara gjatë auditimit.