Një aksion i Policisë së Kosovës në fshatin Dren të Zubin Potokut ka përfunduar me sekuestrimin e një sasie të konsiderueshme armësh, municioni dhe pajisjesh ushtarake. Gjatë bastisjes në pronën e Radisa Kostovicit, 62-vjeçar, janë gjetur dhe konfiskuar armë gjuetie, municion i ndryshëm, një librezë e Ushtrisë së Serbisë dhe pajisje të tjera ushtarake. I dyshuari është ndaluar për 48 orë dhe ndaj tij është iniciuar procedurë penale për mbajtje të paautorizuar të armëve. Hetimet për këtë rast janë ende në vazhdim, ndërsa autoritetet theksojnë se personi konsiderohet i pafajshëm deri në vendim të formës së prerë nga gjykata.