Një gjykatë në kantonin Schwyz të Zvicrës ka dënuar një sipërmarrës kosovar 44-vjeçar për një seri veprash penale financiare, përfshirë transferimin e parave në mënyrë të dyshimtë nga kompanitë e tij zvicerane drejt Kosovës. Ai akuzohet për dëmtim të kreditorëve, mashtrim me kredi shtetërore gjatë pandemisë dhe keqmenaxhim të fondeve, duke përdorur emra të ngjashëm për firmat në të dy vendet për të fshehur transaksionet. Paratë e përfituara u investuan në projekte luksoze në Kosovë, si ndërtimi i një hoteli dhe një kazinoje, të cilat ende nuk janë përfunduar. Gjykata e ka dënuar me 36 muaj burg, prej të cilëve 12 muaj efektiv, dhe i ka kërkuar të paguajë një dëmshpërblim prej 1.5 milionë frangash, si dhe shpenzimet e procedurës, ndërkohë që kërkesa për dëbim nga Zvicra është refuzuar.