Një bjeshkatar gjerman 48-vjeçar ka pësuar lëndime të shumta pas një rrëshqitjeje prej rreth 500 metrash në faqen lindore të majës së Lubotenit, gjatë kthimit nga një aktivitet bjeshkatar. Shërbimi i Kërkim Shpëtimit Malor të Kosovës ka marrë menjëherë thirrjen emergjente dhe ka mobilizuar dy skuadra shpëtimi për të ndërmarrë operacionin në kushte të vështira malore. Pas arritjes në vendin e ngjarjes, ekipet kanë ofruar ndihmën e parë, kanë imobilizuar të lënduarin dhe e kanë evakuuar me metoda specialistike, duke e transportuar më pas me automjete 4x4 deri te pika e takimit me autoambulancën. Operacioni u zhvillua në koordinim me Policinë e Kosovës, Ambasadën Gjermane, Shërbimin e Urgjencës në Ferizaj dhe autoritetet e tjera, ndërsa gjendja e bjeshkatarit raportohet stabile dhe i dëshirohet shërim i shpejtë.