Policia e Tiranës finalizoi operacionin e koduar “Hold on”, duke zbuluar një call center në bulevardin “Gjergj Fishta” ku kryhej mashtrim kompjuterik i organizuar. Gjatë ndërhyrjes u arrestuan në flagrancë katër administratorë të veprimtarisë, ndërsa 49 punonjës të tjerë u proceduan në gjendje të lirë. Në ambientet e call center-it u sekuestruan 94 kompjuterë, 11 celularë, 2 iPad dhe 107 pajisje të tjera elektronike që do të shërbejnë si prova në hetime. Operacioni u zhvillua nga specialistët e Krimeve Ekonomiko-Financiare dhe Krimeve Kibernetike në bashkëpunim me Prokurorinë e Tiranës, pas informacioneve operative që çuan në goditjen e kësaj veprimtarie të paligjshme.