Një defekt teknik në sistemin e furnizimit me energji elektrike ka shkaktuar ndërprerje të përkohshme të operacioneve në Klinikën e Kirurgjisë Abdominale dhe Klinikën e Kirurgjisë Plastike në Qendrën Klinike Universitare të Kosovës. Problemi u shfaq në orët e mëngjesit dhe lidhej me defektin në kontaktorin e sistemit gjenerator–rrjet, që çoi në dëmtimin e trafove vetanake të sallave operative. Ekipet teknike reaguan menjëherë dhe po punojnë intensivisht për rikthimin e funksionalitetit, me pritshmërinë që gjatë ditës të rifillojnë operacionet në këto dy klinika. Sipas zëdhënëses së QKUK-së, pjesa tjetër e rrjetit elektroenergjetik në sallat e tjera është funksionale dhe nuk ka probleme në furnizimin me energji elektrike.