Prokuroria pranë Gjykatës së Shkallës së Parë Fier ka përfunduar hetimet dhe ka dërguar në gjyq shoqërinë “P V” sh.p.k. dhe administratorin e saj, B. A., për dëmtimin e zonës së mbrojtur mjedisore në lumin Vjosë. Veprimtaria e paligjshme përfshinte marrjen, nxjerrjen, përpunimin dhe transportimin e inerteve në një zonë me mbrojtje të lartë, duke shkaktuar dëmtime të konsiderueshme në habitatin natyror dhe biodiversitetin e zonës. Gjykata ka shpallur fajtor subjektin dhe administratorin për veprën penale të dëmtimit të habitateve në zonat e mbrojtura, duke theksuar se veprimet kanë sjellë ndryshime rrënjësore dhe të pandreqshme në strukturën dhe funksionet e ekosistemeve. Prokuroria Fier vijon të përqendrohet në luftën kundër veprave penale mjedisore, duke ndjekur me prioritet çdo rast që kërcënon mjedisin dhe zonat natyrore të mbrojtura.