Gjykata Themelore në Pejë, dega në Istog, ka dënuar tre persona, Ajet Kuqi, Xhevdet Cacaj dhe Idriz Gashi, për veprën penale të fajdesë, duke u shqiptuar dënime me burg dhe gjoba financiare. Kuqi dhe Cacaj u dënuan me nga 1 vit e 4 muaj burgim dhe nga 1 mijë euro gjobë, ndërsa Gashi me 1 vit e 1 muaj burgim dhe 800 euro gjobë, si dhe të treve iu urdhërua kompensimi i dëmit prej 11 mijë e 200 euro në total ndaj të dëmtuarit Rifat Jasiq. Akuza ndaj të akuzuarit të katërt, Isuf Thaqi, u refuzua për shkak të parashkrimit absolut të ndjekjes penale. Gjykata vlerësoi si të besueshme dëshmitë e të dëmtuarit dhe dëshmitarit tjetër, ndërsa deklaratat e të akuzuarve u konsideruan të pabesueshme dhe me qëllim shmangien e përgjegjësisë.