Gjykata e Posaçme kundër Korrupsionit dhe Krimit të Organizuar ka shpallur fajtorë ish-ushtruesen e detyrës së kryetares së Bashkisë Tropojë, Zyra Islamaj, dhe ndërtuesin Rrok Gega për veprat penale të korrupsionit pasiv dhe aktiv. Islamaj është dënuar me 2 vite e 1 muaj burg, dënim i cili është pezulluar dhe zëvendësuar me 2 vite shërbim prove, ndërsa i është ndaluar ushtrimi i funksioneve publike për 5 vite. Ndërtuesi Gega ka marrë një dënim prej 6 muajsh burg, gjithashtu të pezulluar dhe konvertuar në 1 vit shërbim prove. Hetimet zbuluan se ish-zyrtarja kishte kërkuar ndërtimin e një ure pranë banesës së motrës së saj, jashtë projektit fillestar, duke ushtruar ndikim për realizimin e punimeve dhe përfshirë edhe teknikun e mirëmbajtjes së rrugëve në bashki.