Gjykata Themelore në Prishtinë ka shpallur aktgjykimin ndaj Vullnet Gashit, i akuzuar për aksidentin fatal që ndodhi më 2 dhjetor 2023 në rrugën “Bill Clinton”. Gashi, i cili drejtonte automjetin pa patentë dhe me një histori prej 117 dënimesh për kundërvajtje në trafik, goditi këmbësorin Ferhat Bejtullahun, i cili humbi jetën si pasojë e plagëve të marra. Prokuroria e akuzoi për rrezikim të trafikut publik dhe kërkoi dënim me burgim efektiv, duke theksuar rëndësinë e pasojave tragjike dhe historikun e të akuzuarit. Gjykata e ka dënuar Gashin me 1 vit e 4 muaj burgim, i është marrë patenta dhe i është ndaluar marrja e një lejeje të re për katër vjet, ndërsa aktgjykimi nuk është i formës së prerë.