Gjykata e Posaçme kundër Korrupsionit dhe Krimit të Organizuar ka dënuar me 7 vite e 4 muaj burg Erio Zejnon, i akuzuar për sigurimin e kushteve dhe mjeteve materiale për kryerjen e vrasjeve ndaj dy personave, Ervis Matodashaj dhe Ines Hajrulla. Ai u gjet fajtor për veprat penale të mbajtjes pa leje të armëve dhe pjesëmarrjes në grup të strukturuar kriminal. Fillimisht, dënimi i tij ishte 11 vite burg, por për shkak të gjykimit të shkurtuar, ai përfitoi uljen e një të tretës së dënimit. Vendimi i gjykatës parashikon që Zejno të vuajë dënimin në një burg me siguri të lartë, ndërsa kundër tij lejohet ankim brenda 15 ditëve nga komunikimi i vendimit.