Gjykata e Apelit ka refuzuar ankesën e avokatit të Arif Fetahajt dhe ka vërtetuar dënimin me dy vite burgim me kusht për veprën penale “Mbikëqyrja e pandërgjegjshme e trafikut publik”. Fetahaj, si menaxher i mirëmbajtjes së rrugës në segmentin Prishtinë-Pejë, nuk ka ndërmarrë masat e duhura për vendosjen e shenjave të rrezikut, duke rrezikuar jetën e përdoruesve të rrugës. Si pasojë e mungesës së shenjave dhe kushteve të vështira të rrugës, ka ndodhur një aksident zinxhir me përfshirjen e 15 automjeteve dhe lëndime të rënda e të lehta trupore për disa persona. Mbrojtja ka pretenduar se periudha kohore për ndërhyrje ka qenë shumë e shkurtër dhe se nuk ka prova të mjaftueshme për fajësimin e Fetahajt, por gjykata ka vlerësuar se dënimi dhe aktgjykimi janë të ligjshëm dhe të bazuar në prova të plota.