Gjykata Themelore në Prishtinë ka dënuar Vesel Bunjakun me shtatë muaj burgim efektiv dhe 2 mijë euro gjobë për manipulim me prova dhe mbajtje të paautorizuar të armëve në rastin “Capat vs Sekiraqt”. Bunjaku kishte pranuar fajësinë për këto vepra dhe dënimi i tij përfshin edhe kohën e kaluar në paraburgim nga shtatori 2024 deri në prill 2025. Sipas aktakuzës, ai dyshohet se pas një përleshjeje me armë në një lokal, ka marrë dy pistoleta gjysmë-automatike dhe i ka fshehur në pjesën e pasme të lokalit për të manipuluar provat. Aktgjykimi u shpall nga një trup gjykues i përbërë nga kryetarja Fatime Dermaku dhe anëtarët Ertan Sejfullah dhe Altin Murseli, ndërsa në seancë ishte i pranishëm vetëm i akuzuari.