Gjykata Themelore në Prishtinë ka shpallur fajtorë dhe ka dënuar me 20 vjet burgim Nazmije Millakun për vrasjen e kunatit të saj, Xh.M., ngjarje kjo që ndodhi më 20 gusht 2024 në korridorin e përbashkët të shtëpive të tyre. Sipas aktakuzës, Millaku veproi me dashje dhe për motive xhelozie, duke qëlluar disa herë me armë zjarri kunatin, i cili vdiq si pasojë e plagëve të shumta të shkaktuara nga 11 të shtëna. Gjykata e ka liruar nga akuza për armëmbajtje pa leje, pasi nuk u provua kjo vepër, por ka urdhëruar konfiskimin dhe shkatërrimin e armës së përdorur. E dëmtuara në këtë rast, Suzana Millaku, ishte e pranishme gjatë shpalljes së aktgjykimit, ndërsa e akuzuara dhe avokatja e saj munguan.