Ish-ministri i Sporteve dhe Kulturës, Ylli Pango, u paraqit në Gjykatën e Posaçme për Krimet e Rënda si dëshmitar në gjyqin e dosjes “Partizani”, që lidhet me privatizimin e kompleksit sportiv me të njëjtin emër. Gjatë dëshmisë së tij, Pango theksoi se ngjarjet datojnë rreth 18 vite më parë dhe se është e vështirë të kujtojë detaje konkrete pa u referuar dokumenteve të kohës, pasi ka shërbyer në disa sektorë dhe nuk ka qenë pjesë e vendimeve specifike për këtë çështje. Ai pranoi se një pjesë e pronës së klubit ishte e zaptuar në atë periudhë dhe se privatizimi i pronave ishte një objektiv i madh, por theksoi se disa vendime administrative mund të jenë të pavlefshme. Ish-ministri u shpreh se nuk ka qenë iniciator i vendimeve për privatizim apo koncesion dhe se nuk ka marrë pjesë në mbledhjet e qeverisë që kanë trajtuar këtë çështje, duke theksuar gatishmërinë për bashkëpunim në procesin gjyqësor.