Në gjykimin ndaj Momir Pantiqit dhe Zharko Zariqit për krime lufte në Istog, dëshmitari Avdi Rexhaj rrëfeu për dëbimin e dhunshëm të familjeve shqiptare më 7 maj 1999. Ai përshkroi se si ishin mbledhur në kolonë me traktorë dhe se Pantiq, i cili atëherë ishte kryeshef i Policisë së Istogut, i drejtonte drejt rrugës për në Shqipëri, ndërsa ata ishin plaçkitur dhe maltretuar. Aktakuza e Prokurorisë Speciale të Kosovës ngarkon të pandehurit për krime të rënda, përfshirë dhunën sistematike ndaj të burgosurve shqiptarë në burgun e Dubravës, vrasje dhe dhunime seksuale të civilëve shqiptarë. Sipas aktakuzës, forcat policore serbe nën komandën e Pantiqit kanë kryer sulme mizore dhe vrasje masive gjatë dhe pas bombardimeve të NATO-s në maj 1999.