Prokuroria Themelore Publike e Shkupit ka nisur procedura penale ndaj dy personave të dyshuar për raste të rënda dhune familjare. Njëri prej tyre, një 56-vjeçar, ka ushtruar për një kohë të gjatë dhunë psikologjike dhe fizike ndaj bashkëshortes dhe dy fëmijëve të tij, duke shkaktuar një situatë të rëndë që çoi vajzën 15-vjeçare në tentativë vetëvrasjeje. Në rastin tjetër, një 33-vjeçar ka ushtruar dhunë fizike ndaj bashkëshortes së tij, duke e kërcënuar dhe goditur, me pasoja lëndimesh trupore për viktimën. Prokuroria ka kërkuar masa sigurie për të dy të dyshuarit, duke përfshirë ndalimin e largimit nga vendbanimi, ndalimin e kontaktit me viktimat dhe konfiskimin e dokumenteve të udhëtimit, për të mbrojtur sigurinë e tyre dhe për të parandaluar përshkallëzimin e dhunës.