Shefi i UNMIK-ut, Peter Due, ka bërë thirrje të forta për ndërmarrjen e veprimeve urgjente nga institucionet e Kosovës për të ndalur dhunën ndaj grave, pas vrasjes së dy grave nga bashkëshortët e tyre brenda pak ditësh. Ai thekson se kjo dhunë nuk duhet asnjëherë të tolerohet, normalizohet apo trajtohet si çështje private, duke e cilësuar si një problem serioz dhe urgjent të të drejtave të njeriut. Përfaqësuesi Special i Sekretarit të Përgjithshëm i ka shprehur ngushëllimet familjeve të viktimave dhe ka kërkuar hetime të shpejta, të plota dhe të paanshme, si dhe respektimin e procesit ligjor për përgjegjësi të plotë. Ai gjithashtu ka bërë thirrje për intensifikim dhe koordinim të veprimeve për parandalimin e dhunës me bazë gjinore, mbrojtjen e grave në rrezik dhe sigurimin e qasjes së tyre në mbrojtje, shërbime mbështetëse dhe drejtësi në kohë.