Koalicioni i OJQ-ve për Mbrojtjen e Fëmijëve – KOMF ka shprehur shqetësim të thellë pas publikimit të pamjeve ku një vajzë 12-vjeçare është dhunuar nga një vajzë 18-vjeçare. Përveç aktit të dhunës, shqetësues është fakti që ngjarja është filmuar dhe shpërndarë, duke rrezikuar stigmatizimin dhe ritraumatizimin e viktimës. KOMF kërkon reagim të menjëhershëm institucional, përfshirë aktivizimin e mekanizmave të mbrojtjes së fëmijëve, ndërhyrjen e shërbimeve sociale dhe masat e drejtësisë ndaj përgjegjësve. Po ashtu, organizata thekson nevojën për programe parandaluese, mbështetje për shëndetin mendor të fëmijëve dhe edukim për zgjidhjen paqësore të konflikteve, duke theksuar se parandalimi i dhunës është përgjegjësi e përbashkët e familjes, shkollës dhe institucioneve.