Më 1 dhe 2 qershor, në Akademinë e Kosovës për Siguri Publike u organizua një aksion humanitar për dhurim vullnetar të gjakut, ku morën pjesë 298 kadetë dhe pjesëtarë të Policisë së Kosovës. Mes tyre ishte edhe djali i Afrim Bunjakut, rreshterit hero të Policisë së Kosovës, i cili u vra në sulmin terrorist në Banjskë më 24 shtator 2023, duke mbrojtur rendin dhe sigurinë e vendit. Ky aksion u organizua në bashkëpunim me Qendrën Kombëtare për Dhurimin Vullnetar të Gjakut dhe synon të promovojë humanizmin dhe përgjegjësinë qytetare tek gjeneratat e reja të policëve. Policia e Kosovës thekson gatishmërinë e vazhdueshme për të ndihmuar në sigurimin e gjakut për pacientët në nevojë, veçanërisht gjatë periudhave kur kërkesat janë më të larta.