Dogana e Kosovës ka asgjësuar 146,886 copë sprej për higjienën e gojës të falsifikuara, të cilat mbanin në mënyrë të paautorizuar markat tregtare “Coca-Cola”, “Fanta” dhe “Sprite”. Këto produkte u sekuestruan pas dyshimeve për shkelje të të drejtave të pronësisë intelektuale dhe pas verifikimeve të kryera në bashkëpunim me autoritetet kompetente dhe bartësit e të drejtave. Gjykata kompetente ka marrë vendim për asgjësimin e tyre, duke theksuar rrezikun që këto produkte të falsifikuara paraqesin për shëndetin e qytetarëve, pasi nuk i nënshtrohen kontrolleve të standardeve të sigurisë dhe cilësisë. Dogana e Kosovës njofton se do të vazhdojë me kontrolle dhe masa të shtuara kundër mallrave të falsifikuara për të mbrojtur shëndetin publik dhe ekonominë e vendit.