Dogana e Kosovës ka kryer një operacion kontrolli në pesë depo të ndryshme në rajonin e Prishtinës, ku ka sekuestruar mallra të dyshuara për kontrabandë në vlerë rreth 800 mijë euro. Gjatë kontrolleve janë gjetur sasi të konsiderueshme mbathjesh sportive me marka të mbrojtura dhe veshje tekstili, të cilat dyshohet se nuk posedojnë dokumentacion të rregullt për origjinën dhe zhdoganimin në Kosovë. Pas evidentimit të rastit, është njoftuar Prokuroria Themelore në Prishtinë, e cila ka autorizuar ndërmarrjen e veprimeve të mëtejshme procedurale, duke përfshirë intervistimin e personave të dyshuar lidhur me pronësinë e mallrave. Mallrat e sekuestruara janë duke u inventarizuar dhe konfiskuar, ndërsa Dogana thekson përkushtimin e saj në luftimin e kontrabandës dhe mbrojtjen e tregut të ligjshëm në Republikën e Kosovës.