Dogana e Kosovës ka kryer kontrolle në tri lokale në Prishtinë, ku ka ndaluar gjithsej 23,918 artikuj të ndryshëm, përfshirë mbrojtëse për telefona, kufje AirPods, kabllo, orë inteligjente dhe aksesorë elektronikë të markave të njohura si Apple, Louis Vuitton, Prada, Gucci dhe Guess. Në dy nga subjektet e kontrolluara janë ndërmarrë masa kundërvajtëse, ndërsa për subjektin e tretë, për shkak të sasisë dhe vlerës së lartë të mallrave, është njoftuar Prokuroria Themelore në Prishtinë për trajtim të mëtejshëm. Të gjitha mallrat janë vendosur nën mbikëqyrje doganore dhe do t’i nënshtrohen verifikimit të dokumentacionit dhe respektimit të ligjit për pronësinë intelektuale. Dogana thekson angazhimin e saj në luftën kundër kontrabandës dhe ekonomisë joformale, duke mbrojtur tregun e ligjshëm dhe interesat e konsumatorëve.