Dogana e Kosovës ka sekuestruar 3,480 mbushës për telefona celularë me markën Apple, të cilët dyshohen si produkte të falsifikuara që shkelin të drejtat e pronësisë intelektuale. Kjo sasi e madhe u kap në Terminalin Doganor në Vërmicë gjatë kontrollit të një dërgese me origjinë nga Kina, e paraqitur për zhdoganim. Pas rivlerësimit dhe kontrollit fizik të mallrave, zyrtarët doganorë kanë ndërmarrë masat ligjore për ndalimin e tyre dhe kanë njoftuar palët relevante për verifikimin e autenticitetit të produkteve. Dogana e Kosovës thekson përkushtimin e saj në luftimin e tregtisë së mallrave të falsifikuara dhe mbrojtjen e konsumatorëve dhe bizneseve legjitime në vend.