Instituti i Kosovës për Drejtësi (IKD) ka publikuar raportin “Drejtësia Civile në Kosovë 2025”, i cili evidenton probleme serioze në trajtimin e rasteve civile në gjyqësor. Kohëzgjatja mesatare e trajtimit të rasteve arrin deri në 1451 ditë, ndërsa disa lëndë mbeten të pazgjidhura edhe për më shumë se 12 vjet, duke ngritur dyshime për trajtim të pabarabartë dhe zvarritje të theksuar të procedurave. Raporti tregon se gjykatat themelore kanë ulur numrin e lëndëve të pazgjidhura, por ngarkesa mbetet e lartë dhe ka dallime të mëdha në efikasitetin e gjyqtarëve dhe shpërndarjen e tyre nëpër gjykata. Problematike mbetet edhe shtyrja e seancave dhe përdorimi i kufizuar i ndërmjetësimit si mënyrë alternative për zgjidhjen e kontesteve, ndërsa tarifat gjyqësore paraqiten si pengesë për qasjen në drejtësi, një shqetësim që nuk pranohet nga të gjithë aktorët e sistemit gjyqësor.