Ushtruesi i detyrës së kryeprokurorit të Shtetit, Agron Qalaj, ka theksuar rëndësinë e një sistemi drejtësie që fokusohet në rehabilitimin e fëmijëve dhe jo vetëm në ndëshkimin e tyre. Ai ka nënvizuar angazhimin institucional për avancimin e drejtësisë për të mitur, duke respektuar standardet ndërkombëtare dhe parimet e shtetit të së drejtës. Qalaj ka theksuar se është detyrë e institucioneve të krijojnë mundësi reale për edukim dhe riintegrim të të miturve që bien ndesh me ligjin, duke treguar kështu pjekuri dhe vizion afatgjatë për sigurinë shoqërore. Fushata “Drejtësi që sheh fëmijën”, e organizuar nga Koalicioni i OJQ-ve për Mbrojtjen e Fëmijëve dhe “Terre des hommes”, shënon një hap të rëndësishëm në këtë drejtim.