Autoritetet në Shqipëri janë alarmuar nga një lloj i ri droge në formë xhelatine apo karameleje, e cila po shpërndahet kryesisht online dhe është lehtësisht e aksesueshme nga të rinjtë dhe adoleshentët. Në pesë muajt e parë të vitit janë sekuestruar rreth 700 gramë të kësaj substance, ndërsa policia ka zbuluar edhe një ambient në Durrës ku droga përpunohej në këtë formë të maskuar. Kjo substancë, megjithëse duket e parrezikshme, mund të shkaktojë pasoja serioze shëndetësore për konsumatorët e rinj që nuk kanë informacion të mjaftueshëm për përbërjen e saj. Për shkak të këtij rreziku, Policia e Shtetit ka njoftuar Ministrinë e Arsimit për të ndërmarrë masa kundër përhapjes së kësaj droge mes adoleshentëve, ndërsa janë sekuestruar gjithashtu sasi të mëdha të drogërave të tjera si kokaina, heroinë dhe kanabis.