Katër kartëmonedha prej 500 eurosh, me vlerë totale 2 mijë euro, janë depozituar në Bankën për Biznes (BPB) në Ferizaj dhe kanë ngritur dyshime për falsifikim. Dyshimet u shkaktuan nga numrat serikë shumë të ngjashëm të kartëmonedhave, që ndezën alarmin në bankë dhe çuan në raportimin e rastit në Polici dhe Prokurori. Njësitë policore kanë sekuestruar kartëmonedhat dhe hetuesit po kryejnë ekzaminime për të përcaktuar nëse ato janë të falsifikuara, si dhe për të zbuluar prejardhjen dhe mënyrën e futjes së tyre në bankë. Në këtë fazë nuk ka një përgjegjës të konfirmuar, por hetimet janë në vazhdim nën mbikëqyrjen e Prokurorisë për Krime të Rënda.